hehawewa

始終係醫學美容品牌，價錢會貴啲，但呢個精華膜真係超級好用。質地creamy呈乳白色，好細滑易推易搽，有淡淡花香味，薄敷15分鐘就可以沖洗乾淨，皮膚好吸收，臉上好似有層薄膜敷住咁，但摸起嚟好清爽唔黏笠，保濕度又高，第二朝仲好易上妝。敷咗一個月，膚色均勻咗，暗瘡印淡咗，大推！

三分子玻尿酸藍銅精華係我用過嘅精華液入面排頭三位！佢唔似一般精華液有好重乳質油膩感，質地偏水性，透明帶點淡藍色，因為添加咗藍銅，所以味道的唔係太好，不過我可以接受。保濕能力非常高，皮膚一下子就吸收晒，好潤澤，用後唔會出油。

一款好用但好貴嘅面膜，平均百幾蚊一塊，敷一塊等於食餐飯！生物纖維面膜嘅質地好似果凍，好貼臉，袋入面勁多乳白色嘅精華液，我會敷完再搽臉，敷完塊面好保濕好滋潤，美白效果可能要日日敷先睇得出，但實在太貴啦！

eos潤唇球有好多味道，球狀唇膏偏硬身，冇支裝嘅潤唇膏咁易斷同變形，使用都好方便，喺嘴轉一圈就得，不過嫌佢收藏麻煩，圓碌碌好阻掟。夏天用會覺得太黏笠，冬天用會好啲，幾滋潤。

睇介紹話Za呢支係將化妝水、精華液、乳液三效合一，搽一支就有3種效果，絕對係懶人恩物！質地偏濃稠，擠出嚟半透明，有好多細細嘅白色微粒，水潤易推，皮膚唔會感覺到啲微粒，而且好易吸收，亦好保濕。

洗臉最緊要乾淨！Za潔面泡沫質地濃稠，膏狀擠出嚟好厚身，少少一顆就夠，加水勁易推開起泡，泡泡細緻綿密，仲有清新嘅花香味，洗完皮膚好清爽乾淨，唔繃緊，搭配同款保濕乳液，皮膚勁水潤。

Za呢支保濕乳液，質地偏水乳狀，輕薄易推，滲透度高，用後皮膚唔會覺得好黏笠，保濕度都ok，感覺肌膚好水潤，仲有淡淡嘅香味，好好聞，個人嚟講幾鍾意。

Za呢個系列包裝非常搶眼，shocking pink嘅顏色喺貨架一眼就搵到。質地透明偏水，有淡淡嘅香味，拍上臉好順滑，但滲透度一般，要用手指輕輕按摩幫助皮膚吸收，用後有潤澤感而不黏笠，不過夏天朝早用可能會嫌唔清爽。

呢支美白隔離乳霜唔算得上好好用，話佢唔好用又唔係，不過不失啦。保濕效果一般，膚色係有改善，冇咁暗沉，雖然話佢有美白同防曬功效，但有得揀我唔會用佢。

質地柔滑，輕薄易推，保濕效果唔錯，冬天用都唔會太乾，持久力高，不易脫妝，有效修飾肌膚上的毛孔瑕疵，妝感自然細緻。

質地較厚身，易推易上妝，有效遮蓋毛孔、黑眼圈，仲可以調節均勻膚色，妝感貼服自然，佢仲有改善皺紋同美白成份，不過始終係韓國產品，BB Cream都比較偏白，皮膚黑唔太啱用。

我皮膚比較敏感，唔係隻隻BB Cushion都啱用，朋友介紹試下Laneige，睇資料原來佢嘅BB Cushion分咗唔同功效，年紀大緊係買抗衰老嗰種。顏色都幾多，有成7隻色，質地好水潤，容易上妝，又遮蓋到暗啞膚色，妝感清爽貼薄，但透氣性麻麻，試過浮粉。